ମହାନଦୀ ପୋଲରୁ ବସ ଖସି ମୃତ୍ୟୁ ସଂଖ୍ୟା ୧୨କୁ ବୃଦ୍ଧି

0
384
bus-fell-into-mahanadi-rescued-operation-continued

କଟକ : ଅନୁଗୋଳ ଜିଲ୍ଲା ତାଳଚେରରୁ ୫୪ ଜଣରୁ ଅଧିକ ଯାତ୍ରୀଙ୍କୁ ଧରି ବସ୍ଟି ଭୁବନେଶ୍ୱର ଆସୁଥିଲା। ତେବେ କଟକ ଜିଲ୍ଲା ଜଗତପୁର-ଶିଖରପୁର ମଝି ମହାନଦୀର ପୋଲ ଉପରେ ବସ୍‌ ସମ୍ମୁଖକୁ ଗୋଟିଏ ମଇଁଷି ଚାଲି ଆସିଥିଲା। ଫଳରେ ବସ୍‌ଟି ମଇଁଷିକୁ ଧକ୍କା ଦେଇ ପୋଲର ବାଡ଼ ଭାଙ୍ଗି ନଦୀକୁ ଖସି ପଡ଼ିଥିଲା। ତଳେ ପାଣି ନଥିବାରୁ ବସ୍‌ଟି ବାଲି ଉପରେ ପଡ଼ିଥିଲା।ଏହି ବାଲିଶଯ୍ୟାରେ ଲିଭିଗଲା ୧୨ ଜୀବନ ଦୀପ। ମୃତକଙ୍କ ମଧ୍ୟରେ ୯ ଜଣ ପୁରୁଷ ଓ ୩ ଜଣ ମହିଳା ଅଛନ୍ତି। ୪୯ ଜଣ ଗୁରୁତର ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି। ଏନେଇ ସୂଚନା ଦେଇଛନ୍ତି କଟକ ବଡ ମେଡିକାଲ୍‌ର ଜରୁରୀକାଳୀନଅଧିକାରୀ ଭୁବନାନନ୍ଦ ମହାରଣା। ସୂଚନା ଯୋଗ୍ୟ,ଓଡ୍ରାଫ୍ ଟିମ୍ ଓ ଅଗ୍ନିଶମ କର୍ମଚାରୀମାନେ ରଶି ଲଗାଇ ପୋଲ ତଳକୁ ଯାଇଥିଲେ। ଲୁହା କଟର୍ ସାହାଯ୍ୟରେ ବସ୍‌ର ବଡି କାଟି ଭିତରୁ ସମସ୍ତଙ୍କୁ ଉଦ୍ଧାର କରାଯାଇଥିଲା। ଆହତଙ୍କୁ ଦୁଇଟି ବୋଟ୍‌ରେ କୂଳକୁ ନିଆଯାଇଥିଲା। ପରେ ସେଠାରୁ ଆମ୍ୱୁଲାନ୍ସରେ ନିଆଯାଇ ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ୧୨ ଜଣଙ୍କୁ ମୃତ ଘୋଷଣା କରାଯାଇଥିଲା। କଟକ ବଡ଼ ମେଡିକାଲ ୪୯ ଜଣ ଯାତ୍ରୀଙ୍କୁ ଆହତ ଅବସ୍ଥାରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ୪ ଜଣଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ରହିଥିବା ମେଡିକାଲ୍ ସୂତ୍ରରୁ ଜଣାପଡ଼ିଛି। ଏହି ଦୁର୍ଘଟଣାରେ ମୁଖ୍ୟମନ୍ତ୍ରୀ ଦୁଃଖ ପ୍ରକାଶ କରିବା ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କଟକ ଯାଇ ବସ୍‌ ଦୁର୍ଘଟଣାରେ ଆହତ ଯାତ୍ରୀଙ୍କୁ ଭେଟିବା ସହିତ ଅରୋଗ୍ୟ କାମନା କରିଛନ୍ତି। ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ସହାୟତା ଓ ଆହତଙ୍କୁ ମାଗଣା ସ୍ୱାସ୍ଥ୍ୟ ସେବା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।